Пуш уйӑхӗн 25-мӗшӗнче Шупашкарта Чӑваш наци библиотекинче Петӗр Хусанкай ҫуралнӑранпа 110 ҫул ҫитнине халалланӑ «Хастарлӑх ҫӑлкуҫӗ» видеосӑвӑсен конкурсӗнче мала тухнисене чысларӗҫ. Ҫӗнтерӳҫӗсен умӗнче сӑмах калакансен йышӗнче вӗренӳ министрӗ Юрий Исаев, Петӗр Хусанкай ывӑлӗ Атнер Хусанкай, «Сувар» хаҫат редакторӗ Константин Малышев, Чӑваш халӑх сайчӗн тӗп администраторӗ Николай (Аҫтахар) Плотников, YouTube-ри «Шкул ТВ» канал йӗркелӳҫи Владимир Андреев, «Сувар ТВ» йӗркелӳҫи Ултиар Цыпленков тата ыттисем пулчӗҫ. Ҫак конкурса Елчӗк ялӗнчи «Шевле» ача садӗнчи педагогсемпе ачасем те хастар хутшӑнчӗҫ. 3 ҫулхи Вероника Демьяновапа 5 ҫулхи Анна Усанова 3-мӗш вырӑна, музыка ертӳҫи Алина Валериевна Молодова 2-мӗш вырӑна тухма пултарчӗҫ. Вӗсене пурне те Хисеп хучӗ тата асӑнмалӑх парнесем парса чысларӗҫ.